Mat 28 | NdeIBE | STEP | Ngemva kweSabatha, ekuseni ngovivi ngosuku lokuqala lweviki, uMariya Magadalena lomunye uMariya baya ethuneni besiyakhangela.

Matthew 28

Ukuvuka Ekufeni

1 Ngemva kweSabatha, ekuseni ngovivi ngosuku lokuqala lweviki, uMariya Magadalena lomunye uMariya baya ethuneni besiyakhangela.

2 Kwaba lokuzamazama okukhulu komhlaba ngoba ingilosi yeNkosi yehla ivela ezulwini, yaya ethuneni yaligiqela eceleni ilitshe yahlala phezu kwalo. 3 Ukubonakala kwayo kwakunjengombane, lezigqoko zayo zimhlophe nke njengongqoqwane. 4 Abalindi bayesaba baze bathuthumela baba njengabafileyo.

5 Ingilosi yathi kwabesifazana, “Lingesabi, ngoba ngiyazi ukuthi lidinga uJesu owabethelwayo.

6 Kakho lapha; usevukile njengoba watsho. Wozani libone indawo abelele kuyo.

7 Selizahamba masinyane liyotshela abafundi bakhe lithi: ‘Usevukile kwabafileyo, usehamba phambi kwenu ukuya eGalile. Kulapho elizambona khona. Mina sengilitshelile manje.’ ”

8 Yikho abesifazana basebesuka ngokuphangisa ethuneni, besesaba kodwa begcwele intokozo, bagijima ukuyakwazisa abafundi.

9 Khonokho uJesu wahlangana labo. Wathi, “Salibonani.” Beza kuye, bamnamathela ngezandla ezinyaweni zakhe bamkhonza.

10 UJesu wasesithi kubo, “Lingesabi. Hambani liyotshela abafowethu ukuthi baye eGalile; kulapho abazangibona khona.”

Umbiko Wabalindi

11 Kwathi abesifazana sebehambile besendleleni abanye babalindi bangena edolobheni bayabika kubaphristi abakhulu ngakho konke okwakwenzakele. 12 Kwathi abaphristi abakhulu sebehlangene labadala babopha icebo bafumbathisa abalindi imali ezwayo, 13 babatshela bathi, “Libokuthi, ‘Abafundi bakhe beza ebusuku bamntshontsha thina silele.’

14 Uma leli ilizwi lifika kumbusi, sizamsuthisa lani lingangeni enkathazweni.” 15 Yikho amabutho ayithatha imali enza njengokulaywa kwawo. Yikho indaba le seyandiswa yakhula phakathi kwabaJuda kuze kube lamuhla.

Umlayo Omkhulu

16 Abafundi abalitshumi lanye basuka baya eGalile baqonda entabeni uJesu ayethe baye kuyo. 17 Bathi ukumbona bamkhonza; kodwa abanye bathandabuza. 18 UJesu weza kubo wathi, “Wonke amandla ezulwini lasemhlabeni aphiwe mina. 19 Ngakho hambani lenze abafundi ezizweni zonke, libabhaphathize ebizweni likaBaba, leleNdodana lelikaMoya oNgcwele,

20 njalo libafundise ukulalela konke engililaye ngakho. Ngempela ngilani kokuphela, kuze kube sekucineni kwesikhathi.”